فجر المطرب حمادة هلال مفاجأة كبرى حول أحقيته في أغنية “عيش بشوقك” التي طرحها الفنان تامر حسني، منذ 4 سنوات هى أغنيته فى الأساس وشن “هلال” خلال ظهوره في برنامج “حبر سري”، هجوما ضد صناعها الشاعر مصطفى حسن، والملحن بلال سرور.
وقال حمادة هلال، ببرنامج “حبر سري”على قناة “القاهرة والناس”: “(عيش بشوقك) دي غنوتي، قعدت أشتغل عليها 6 شهور وتعبت فيها، والملحن والمؤلف عارفين كويس، وانشغلت عنها في مرض أمي حوالي أسبوعين”.
وتابع، أنه بدأ بعد الأسبوعين يتحدث لتنفيذ الأغنية، وفوجئ بأنها ذهبت في اتجاه آخر، موضحا: “كلمت فريق العمل وقلت لهم دي غنوتي وحقي ده حرام، وفجأة راحت في حتة تانية”.
وأضاف: “أنا كنت فرحان بالأغنية دي، وكنت أقدر أزعل اللي حولوا مسار الأغنية، وكنت ممكن انزل تاني يوم بها على السوشيال ميديا، ولكن استعوضت ربنا، وربنا عوضني بعدها على طول بأغنية (اشرب شاي) اللي كسرت الدنيا وبقت غنوة وإعلان، والفترة دي مش هنساها”.
من جانبه علق الملحن بلال سرور، عبر حسابه الشخصي بموقع “فيس بوك” على تصريحات حمادة هلال قائلا: بمناسبة وصول أغنية عيش بشوقك 130 مليون، وعشان جالي كذا تعليق، متضايقين من طريقه تعليقي على اللي قالو الفنان حماده هلال، فأنا بعتذر أولًا وثانيًا اسمحولي أرد، صديقي الفنان مصطفى حسن، كلم حمادة هلال، وطلب منه يجيلنا يجرب صوته على غنوة مهمة، حمادة جالنا وجرب الأغنية وعجبته، وكان يوم جميل وكله تمام.
وذكر بلال سرور: حمادة اضايق جدًا، وبقى بيطلب مننا بأي شكل نرجع الغنوة وإن المنتج هيديكوا اللي أنتم عايزينه، إحنا طبعًا كنا التزمنًا مع هاني محروس والفنان تامر حسني، وأنا بقسم بالله ومش محتاج أحلف إني من كتر ما صعب عليا حمادة، فكرت أنا ومصطفى نستأذن تامر ونرجعله الأغنية.
واستكمل: في التوقيت ده الفنان حمادة هلال كلم الفنان تامر حسني، وطلب منه الأغنية وافترى علينا وقاله إنها معمولة على أيدي وشقيت فيها، طبعًا ده محصلش، ومش منطقي أصلًا إنه يحصل، بس هو قال كدة عشان يأثر على تامر، وبالفعل الفنان تامر حسني، كلمني وقال لي هو اللي بيقولوا حمادة ده صح، أنا طبعًا ركبني عفريت، وفهمته القصة وخلص الموضوع، واعتذرنا لحمادة وكل الدنيا غلطته، ولما الغنوة نزلت ونجحت بقيت كل ما أقابل حد لمده شهور يقولي ليه عملتوا كدة مع حمادة، أروح مفهمة القصة كإني متهم، وكل الناس اللي فيالوسط عارفين الموضوع ده، وعارفين إن حماده مش صاحب حق.
واختتم حديثه قائلا: دلوقتي بعد ما عدى سنين الموضوع اتفتح، وناس عمالة تبعتلي كلام غريب وأنتو ازاي تعملوا معرفش إيه، الجمهور والفانز أنتو فوق راسنا كلنا واحد واحد، بس مش معنى أنك بتحب فنان أنك تصدق وخلاص وتتهم فنان تاني بحاجات مش حقيقية، الفنان الكبير تامر حسني برة القصة دي تمامًا، وهو مش ناقص أغاني عشان ياخد حاجة مش بتاعته، الغنوة دي غنوة تامر حسني، وأنا فخور أنها في تاريخه وفي مشواري، ولو كنا جينا عليك يا حمادة مكنش ربنا كرمنا فيها، وأنت لو صاحب حق مش هتطلع تقول كدة على فنان ونجم كبير إنت عارف إنه برة القصة، أنا آسف إني طولت وآسف إني بتكلم فمشكلة اصلًا المفروض ليكو عندى فن وبس، كان لازم أرد عشان ميتقالش إنهم ساكتين.
وأضاف سرور: لفترة كبيرة أنا مش متذكر، هي قد إيه كنا بنحاول نكلم حمادة وابعتله رسايل، ومفيش أي نوع رد منه لا بالسلب ولا بالإيجاب، بيروح أفراحه وشغله عادي وحفلاته ويسافر ويرجع وبرده مبيردش، بيقابل فنانين وبيسمع أغاني تانية عندهم وبرضو مبيرجعلناش يقولنا ناوي يعمل إيه، بعد ما صلينا استخارة، وسمعنا الأغنية لصديقنا المنتج هاني محروس، اللي كان بيحضر إنه ينتج أغنية للفنان تامر حسني في التوقيت ده واتفقنا أن الأغنية يغنيها تامر حسني، وبرده حماده مش ظاهر فالصورة.
وتابع: الغنوة سجلناها وبدأ تامر تصويرها، هنا ظهر الفنان حمادة، وبدأ يكلم مصطفى حسن، يلا أنا جبت منتج للأغنية تعالوا ننفذها وهو هيحاسبكم، الفكرة بالنسبة للفنان حمادة إنه مكنش عايز يشتري الأغنية هو كان راكنها وبيدور على حد يشتريها، إحنا طبعًا اتصدمنا وفهمناه أن الأغنية اتباعت، طبعًا هو كان متضايق جدًا، بس ده فشغلنا شئ طول الوقت وارد، لأن إنت ملتزمتش معانا بحاجة، ولا حتى بتقدير إنك تتواصل معانا.
