دعاء أحمد
تنشر وكالة الاخبار المصرية ضمن حملتها التثقفية للرقى بفكر القراء وتوسيع الدائرة المعرفية والتثقفية للشباب كلمات قصيدة ياصيادين السمك من ديوان “كافر بحب بلادى ” للشاعر أحمد سلامة
يا صيادين السمك
رمى الشبك غِيّة
وانا جيت أشد الشبك
طلعتلى بلطية
قلبى الكبير استحى
من ضعفها
رمتها فى المية
يا صيادين المراكب
فى البحر رزق وخير
فى البر كدب وخداع
ياطبالين المواكب
حتى فى قلوب الطير
ياما أكتر الأوجاع
فى البحر مد وجزر
وغريق بيحلم بقشة
فيه ناس بتسكن قصور
وناس بتحلم بعشة
يا موج بيحدف موج
وموج بيحدفنى
سارى الحياة معووج
ومين هيلقفنى..؟!
يا صيادين السمك
رمى الشبك غيّة
وأنا جيت أشد الشبك
طلعتلى بلطية
قلبى الكبير استحى
من ضعفها
رمتها فى المية