*مش لازم ترمى الحته اللى باقيه من السيجاره وهى لسه والعه،معلش تعالى على نفسك وأطفيها حافظ حتى على شويه ول صغيره من الهوا نضيفه وبعدين أنت متضمنش هى ممكن تعمل أيه لو فضلت والعه؟؟
* مش لازم تدخن أصلا يعنى بدل ما تحرق صدرك وتضر صحتك وتضيع فلوسك أدى الفلوس دى لحد بينام من غير عشا_ودول ما أكثرهم فى بلدنا_وأهى برضه حاجه تبقى لك فى أخرتك.
* مش لازم تفتح الشباك مخصوص عشان ترمى كيس السناكس اللى كلته فى الشارع ،يا سيدى أحترم حق غيرك أنه نفسه يعيش فى بيئه نضيفه.
* مش لازم تجيب سيرته وتعلق على مشيته ولا طريقه لبسه أوكلامه أو أكله خليك محترم وما تجرحش حد بكلامك حتى لو هو مش موجود.
* مش لازم كلامك يبقى واقف زى السيف ويقطع خيوط المحبه ممكن تخليه كلام هادئ لطيف يجذب لك كل يوم قلب جديد.
* مش لازم تبحلق فيها من أولها لأخرها وهى ماشيه غض بصرك وأفتكر أن عينك دى ممكن ترميك فى النار.
* مش لازم تشتم وتسب حتى لو كان اللى قدامك يستاهل وهو اللى بدأ خليك أنت الأحسن.
* مش لازم تزعق لوالدتك ولا مراتك على الأكل اللى وقفت طول النهار تحضره عشان سيادتك ، معلش كله وأنت ساكت لأنه كده كده ما فيش غيره وأبقى ألفت نظرهم بأدب ان الأكل جميل بس ممكن يطلع من ايدهم أكل أحسن من كده ،دى الكلمه الطيبه صدقه يا أخى.